येथे क्लिक करुन आम्हाला फॉलो करा
अहिल्यानगर - भारत संचार निगम लिमिटेड (बीएसएनएल) चे निवृत्त उपमंडल अभियंता वसंतराव शिवराम दातीर (वय 68) यांचे दीर्घ आजाराने शनिवारी (29 नोव्हेंबर) सकाळी निधन झाले. नगरच्या अमरधाममध्ये दुपारी त्यांच्या पार्थिवावर शोकाकुल वातावरणात अंत्यसंस्कार करण्यात आले.
राजकीय, सामाजिक, शैक्षणिक व पत्रकारिता क्षेत्रातील मान्यवरांनी उपस्थित राहून त्यांना अंतिम श्रद्धांजली अर्पण केली. मूळचे पिंपरी लौकी (ता. संगमनेर) येथील असलेल्या दातीर यांनी प्रतिकूल परिस्थितीत अभियांत्रिकी शिक्षण पूर्ण केले. बीएसएनएलमधील अभियंता पदावर कार्यरत असताना त्यांनी मुंबई, बेंगळुरू, सातारा, अहमदनगर, कोपरगाव, राहुरी व पारनेर येथे महत्वाची जबाबदारी सांभाळली.
सामाजिक भान जपणारे दातीर वृत्तपत्रांतून विविध प्रासंगिक विषयांवर नियमित लेखन करीत. महाराष्ट्र टाइम्स, सकाळ, लोकमत, नवाकाळ, पुण्यनगरी आदी वृत्तपत्रांत त्यांच्या लेखनाला विशेष प्रसिद्धी मिळाली होती. मुंबईत असताना अखिल भारतीय मराठी नाट्य परिषदेच्या मुंबई मध्यवर्ती शाखेचे आजीव सदस्यत्व त्यांनी स्वीकारले.
धनगर समाज वधू-वर मेळावा उपक्रम जिल्ह्यात प्रथमच सुरू करण्याचा पुढाकारही त्यांचाच. गेल्या पंधरा वर्षांपासून अखंड सुरू असलेल्या या उपक्रमातून असंख्य विवाह जुळले असून राज्यभर विखुरलेल्या समाजाला एकत्र येण्याचे एक व्यासपीठ त्यांनी दिले.
मागील काही दिवसांपासून त्यांच्यावर रुग्णालयात उपचार सुरू होते. शनिवारी सकाळी उपचार सुरू असतानाच त्यांचे निधन झाले. त्यांच्या मागे पत्नी–जिल्हा परिषदेतून निवृत्त शिक्षिका निर्मला दातीर, तीन मुले, सुना व नातवंडे असा परिवार आहे.
आनंदऋषीजी हॉस्पिटलचे वैद्यकीय अधिकारी डॉ. प्रशांत दातीर, पत्रकार निशांत दातीर व नेवासा तहसील कार्यालयातील वरिष्ठ लिपिक श्रीकांत दातीर यांचे ते वडील होत. त्यांच्या निधनाने सामाजिक, शैक्षणिक व पत्रकारिता क्षेत्रातील एक संवेदनशील व्यक्तिमत्व हरपल्याची भावना व्यक्त होत आहे.
