पुणे : बाणेर पोलिसांनी (Baner Police) अमली पदार्थ विरोधी कारवाई करत गांजा विक्रीसाठी आलेल्या दोन तरुणांना अटक केली आहे. जुपिटर हॉस्पिटल (Jupiter Hospital) परिसरात रचलेल्या जाळ्यात हे दोन्ही आरोपी सापडले आहेत. त्यांच्याकडून एकूण ८ लाख ४ हजार ४०० रुपयांचा गांजा आणि इतर साहित्य जप्त केले आहे.
नेमकी घटना काय? : दिनांक १६ मार्च २०२६ रोजी बाणेर पोलीस ठाण्याच्या पोलीस निरीक्षक (गुन्हे) अलका सरग (PI Alka Sarag) यांना गुप्त बातमीदारामार्फत माहिती (Confidential Information) मिळाली होती की,
जुपिटर हॉस्पिटलजवळ दोन इसम गांजा विक्रीसाठी येणार आहेत. त्यामुळे वरिष्ठ पोलीस निरीक्षक चंद्रशेखर सावंत (Senior PI Chandrashekhar Sawant) यांच्या मार्गदर्शनाखाली पोलिसांनी परिसरात सापळा (Trap) रचला.
मध्यरात्री १:३० च्या सुमारास काळ्या रंगाच्या होंडा शाइन मोटारसायकलवरून (क्रमांक MP 46 MW 2413) दोन तरुण तेथे आले. पोलिसांना पाहताच त्यांनी पळून जाण्याचा प्रयत्न केला, मात्र सतर्क पथकाने शिताफीने त्यांचा पाठलाग करून त्यांना ताब्यात घेतले.
अटकेतील आरोपींची नावे :
- अभिषेक भिका बोरसे (वय २४ वर्षे)
- अक्षय भिका बोरसे (वय २९ वर्षे, दोन्ही राहणार: साईदत्त रेसिडेन्सी, चिंचवड, पुणे)
सुरुवातीला आरोपींच्या जवळील लाल रंगाच्या बॅगेत ३.०३४ किलो गांजा सापडला. त्यानंतर पोलिसांनी आरोपींच्या चिंचवड येथील घरावर छापा टाकला असता, तिथे आणखी १३.०८८ किलो शुद्ध गांजा, इलेक्ट्रॉनिक वजन काटा आणि इतर साहित्य मिळून आले. एकूण १६.१२२ किलो गांजा आणि गुन्ह्यात वापरलेली दुचाकी असा एकूण ८.७६ लाखांचा मुद्देमाल पोलिसांनी जप्त केला आहे.
न्यायालयीन कोठडी : बाणेर पोलीस ठाण्यात एन.डी.पी.एस. (NDPS) ॲक्टच्या विविध कलमांनुसार गुन्हा दाखल करण्यात आला असून, न्यायालयाने दोन्ही आरोपींना ८ दिवसांची पोलीस कोठडी सुनावली आहे.
ही कारवाई पोलीस आयुक्त अमितेश कुमार (CP Amitesh Kumar), सहपोलीस आयुक्त रंजन कुमार शर्मा (ACP Ranjankumar Sharma) आणि इतर वरिष्ठ अधिकाऱ्यांच्या मार्गदर्शनाखाली बाणेर पोलिस स्टेशनचे पीआय चंद्रशेखर सावंत यांच्या मार्गदर्शनाखाली पीआय अलका सरग, एपीआय कैलास डाबेराव, गणेश रायकर आणि टीमने यशस्वीरीत्या पार पाडली.
