येथे क्लिक करुन आम्हाला फॉलो करा
बेगमेचा फतवा निघाला,
कोण धरणार रे शिवबाला?
अफझलखानाने विडा उचलला,
"जिवंत धरतो मी शिवबाला!"
भली मोठी फौज घेऊन,
गर्जत गर्जत निघाला,
मंदिरे फोडीत, गावे जाळीत,
खान वाईला येऊन ठेपला!
॥ जी जी जी रं जी ॥
मराठ्यांसमोर काळ ठाकला रं,
जी जी जी रं जी! ॥
छत्रपतींनी युक्ती लढविली,
प्रतापगडावर भेट ठरविली,
खानाची मनीषा धुळीस मिळविली,
दहा नोव्हेंबरची तारीख ठरली!
अहंकारी खानाचा कावा,
शिवरायांनी ओळखला,
कपटाचा डाव रचून खान,
भेटीसाठी सज्ज झाला!
॥ जी जी जी रं जी ॥
शामियान्यात दोघे आले,
भेटीसाठी समोर उभे राहिले,
कपटी खानाने डाव साधला,
गळाभेटीच्या बहाण्याने वार केला!
शिवरायांची मान दाबली,
खंजीराचा वार केला,
पण सिंहासारख्या शिवरायांनी,
खानाचा डाव उलटविला!
वाघनखांनी घाव घातला,
बिछव्याने प्रतिघात केला,
अफझलखानाचा अंत घडवून,
शिवरायांनी इतिहास रचला!
॥ जी जी जी रं जी ॥
सैद बंडा धावून आला,
जिवा महाल्याने त्याला रोखला,
'होता जिवा म्हणून वाचला शिवा',
असा पराक्रम इतिहासात घडला!
प्रतापगडावर गनिम हरला,
मराठ्यांनी जयघोष केला,
सह्याद्रीच्या दऱ्याखोऱ्यांत,
शिवरायांचा जयजयकार झाला!
शिवप्रतापाचा दिवस हा,
इतिहासामध्ये अमर झाला,
शिवरायांच्या पराक्रमाचा,
डंका जगभर गाजला!
बोला छत्रपती शिवाजी महाराज की जय!
॥ जय भवानी! जय शिवराय! ॥
॥ जी जी जी रं जी! ॥
- स्वप्नजा राजे घाटगे (कोल्हापूर)
