शेवगाव : शेवगाव नगरपरिषद निवडणूक 2021 साठी प्रशासनाकडून 15 फेब्रुवारी रोजी जाहीर केलेल्या प्रारूप मतदार यादीतील गोंधळावर वॉर्ड क्रमांक 12 मधील विद्यानगर येथील रहिवाशांनी आक्षेप घेतला आहे. तसेच या मनमानी बदलाच्या विरोधात प्रसंगी उच्च न्यायालयात दाद मागणार असल्याचा इशाराही तक्रार अर्जाद्वारे देण्यात आला आहे.
प्रभाग 12 च्या प्रारूप मतदार यादीमधून नाव वगळून प्रभाग क्रमांक 11 मध्ये नाव गेलेल्या विद्यानगर मधील रहिवाशांनी निवडणूक अधिकारी, प्रांत तथा प्रशासक देवदत्त केकाण यांच्याकडे दिलेल्या तक्रार अर्जात म्हटले आहे, की आमची नावे आतापर्यंत प्रभाग 12 मधील मतदार यादीत होती. नगरपरिषद 2015, लोकसभा 2019 व विधानसभा 2019 च्या निवडणुकीत येथील यादीतूनच आम्ही मतदानाचा हक्क बजावलेला आहे. मग आता नगरपरिषद निवडणूक 2021 साठी 15 फेब्रुवारी रोजी प्रसिद्ध झालेल्या प्रारूप मतदार यादीतून प्रभाग 12 मधून अचानक आमची नावे वगळून दुसऱ्या प्रभाग 11 मध्ये कशी गेली. आमची नावे येथून वगळून दुसऱ्या ठिकाणी टाकण्याची मागणी आम्ही केलेली नाही. तसेच शेवगाव मधील यादीत फेरबदल करण्यासाठी राज्य निवडणूक विभागाकडून देखील आदेश पारित करण्यात आलेले नाहीत. अशा परिस्थितीमध्ये स्वतःच्या मर्जीने मतदार यादीत फेरबदल करण्याचे अधिकार नगरपरिषदेस आहेत का?
दरम्यान, भौगोलिकदृष्ट्या प्रभाग सीमा प्रशासनाने ठरविल्या असून त्या सीमेच्या आतच आमची घरे आहेत. या नियमानुसार देखील आम्ही प्रभाग 12 मघ्येच येतो. मग आमची नावे कुठल्या कारणास्तव, कोणी आणि का वगळली, याची तपासणी करून आमची नावे नियमानुसार आमच्या हक्काच्या प्रभाग 12 च्याच मतदार यादीत ठेवावीत. त्यात कुठलाही बदल करू नये.
बेकायदेशीर व चुकीचा केलेला प्रारूप मतदार यादीतील फेरबदल त्वरीत दुरुस्त करून आमची नावे पूर्ववत प्रभाग 12 मध्ये न घेतल्यास आम्ही नगरपरिषदेची मनमानी व बेकायदेशीर कृतीविरोधात उच्च न्यायालयाच्या औरंगाबाद खडपीठात कायदेशीर दाद मागणार आहोत, असा इशाराही देण्यात आला आहे.
दरम्यान, 15 फेब्रुवारी रोजी नगरपरिषदेकडून प्रसिद्ध करण्यात आलेल्या प्रारूप मतदार याद्यातील बदला बाबत 22 फेब्रुवारी पर्यंत हरकती मागविण्यात आल्या आहेत. त्यामुळे आता आलेल्या हरकतींबाबत निवडणूक अधिकारी केकाण काय निर्णय घेतात
कुटूंबच फोडली
विशेष बाब म्हणजे एकाच कुटुंबाती चार व्यक्तींपैकी आई-वडील प्रभाग 12 मध्ये व मुले, सुना दुसऱ्या प्रभागात अशी विचित्र विभागणी नेमका कुठला निकष लावून करण्यात आली, याचे स्पष्टीकरण नगरपरिषद प्रशासनाकडे आहे काय?
संशयाच्या भोवऱ्यात नगरपरिषद प्रशासन
दरम्यान, प्रभाग 12 प्रमाणेच प्रभाग 11, 20, 21 या प्रभागातील प्रसिद्ध झालेल्या प्रारूप मतदार यादीत असेच मनमानी फेरबदल नगरपरिषद प्रशासनाने केल्याचा आरोप काही नगरसेवक, विविध राजकीय पक्षाचे पदाधिकारी यांनी केला आहे. ऐन निवडणुकीच्या तोंडावर झालेला मतदार यादीतील बदल हा संशयास्पद आहे. तसेच काही ठराविक लोकांना फायदेशीर ठरावा या दृष्टीने हेतुपुरस्सर करण्यात आल्याची चर्चा शेवगावकरांमध्ये होताना दिसत आहे.
मनमानी फेरबदल करणारांवर कारवाई करा
मतदार यादीत कुठल्याही वरिष्ठ आदेशाशिवाय फेरबदल करत मनमानी कारभार करून मतदारांना मनस्ताप देणाऱ्या आणि मतदार यादीसारख्या महत्वाच्या सरकारी दस्ताऐवजाशी छेडखाणी करणाऱ्या संबंधित अधिकारी व कर्मचाऱ्यांवर कायदेशीर कारवाई करावी, अशी मागणीही तक्रारीत करण्यात आली आहे.
