अहिल्यानगर - कोपरगाव शहर पोलीस स्टेशनच्या हद्दीत पोलिसांनी मोठ्या प्रमाणावर गुटखा आणि सुगंधित तंबाखूचा साठा जप्त करत ७६.८० लाख रुपये किंमतीचा मुद्देमाल हस्तगत केला आहे.
याप्रकरणी एका आरोपीस अटक करण्यात आली आहे. ही कारवाई अहिल्यानगरचे पोलीस अधीक्षक सोमनाथ घार्गे यांच्या विशेष पथकाने केली.
दि. ८ जुलै रोजी कोपरगाव शहरात गुटख्याची अवैध वाहतूक होत असल्याची गुप्त माहिती मिळताच, परिविक्षाधीन पोलीस उपअधीक्षक संतोष खाडे यांच्या मार्गदर्शनाखाली विशेष पथकाने समृद्धी महामार्गावरील कोपरगावकडे जाणाऱ्या टोलनाक्याजवळ सापळा रचला.
थोड्याच वेळात काळ्या ताडपत्रीने झाकलेला क्रमांकाचा आयशर टेम्पो येताना दिसल्याने त्याला अडवण्यात आले. चालकाची विचारपूस केली असता त्याने आपले नाव अकील रमजान शेख (रा. आदिलाबाद, तेलंगणा) असे सांगितले.
वाहनाची तपासणी केली असता त्यामध्ये बाजीराव रॉयल पानमसाला व मस्तानी २१६ सुगंधित तंबाखू भरलेल्या एकूण १५० गोण्या आढळल्या. त्याची एकूण किंमत ६४.८० लाख रुपये आहे, तर टेम्पोची किंमत १२ लाख रुपये असून एकूण मुद्देमाल ७६.८० लाख रुपये आहे.
हा माल 'मामू रोडलाईन' या ट्रान्सपोर्ट कंपनीच्या माध्यमातून वाहून नेण्यात येत असल्याचे त्याने सांगितले. पोलिसांनी व अन्न सुरक्षा अधिकाऱ्यांनी पंचनामा करून सीलबंद नमुने प्रयोगशाळेत तपासणीसाठी पाठवले. उर्वरित मुद्देमाल जप्त करण्यात आला आहे.
याप्रकरणी अन्न सुरक्षा अधिकारी राजेश बडे यांच्या फिर्यादीवरून अन्न सुरक्षा कायद्यानुसार गुन्हा नोंदवण्यात आला आहे. ही कारवाई अपर पोलीस अधीक्षक वैभव कलुबर्मे, उपविभागीय अधिकारी शिरीष वमने यांच्या मार्गदर्शनाखाली करण्यात आली.
ही कामगिरी पोलिस उपनिरीक्षक राजेंद्र वाघ, सहायक फौजदार शकील शेख, हेड कोन्स्टेबल शंकर चौधरी, अजय साठे, पोहेकों दिगंबर कारखिले, मल्लिकार्जुन बनकर, सुनिल पवार, उमेश खेडकर, अरविंद भिंगारदिवे, दिनेश मोरे, आदींच्या पथकाने केली.
