अहिल्यानगर - शेअर ट्रेडिंगमध्ये अधिक नफा मिळवून देण्याचे आमिष दाखवत व्हॉट्सअ‍ॅपच्या ग्रुपद्वारे तब्बल ४७ लाख रुपयांची आर्थिक फसवणूक करण्यात आली आहे. याप्रकरणी सायबर पोलिसांनी चार जणांना अटक केली आहे.
या प्रकरणात आरोपींनी बनावट गुंतवणूक सल्लागार असल्याचा बनाव करून फिर्यादीकडून ४७ लाख ३ हजार ५४३ रुपये उकळले होते. फिर्यादीने २९ जुलै २०२४ रोजी तक्रार दिली आहे. आरोपी अनिका शर्मा हिने फिर्यादीशी संपर्क साधत शेअर ट्रेडिंगमध्ये गुंतवणुकीस आकर्षक परतावा मिळेल, असे सांगून विश्‍वास संपादन केला.
दि. १९ जून ते ११ जुलै २०२४ या कालावधीत रक्कम उकळण्यात आली. तक्रारीच्या अनुषंगाने सायबर पोलिसांनी भा.दं.वि. कलम ३१९(२), ३१८(४) आणि माहिती तंत्रज्ञान कायद्यान्वये गुन्हा दाखल केला. पोलिसांनी तांत्रिक विश्लेषणाद्वारे कोटक महिंद्रा व एचडीएफसी बँकेतील व्यवहारांचा मागोवा घेतला.
तपासात आरोपी जावेदभाई सुमारा व जिग्नेश कलसरिया यांच्या नावावर फसवणुकीसाठी वापरण्यात आलेली बँक खाती असल्याचे निष्पन्न झाले. तसेच महादेव गेढिया व रवी आजगिया यांनी ती खाती उघडण्यात सहाय्य केल्याचे स्पष्ट झाले.
२४ जुलै रोजी सायबर पोलिसांनी गुजरातमधून या आरोपींना अटक केली :
- जावेदभाई मोहम्मदभाई सुमारा (४०), काजली
- वेरावलजिग्नेश मोहनभाई कलसरिया (२७), सनोसरी, गिरगढडा
- महादेव जसुभाई गेढिया (३०), पर्वत पटिया, सुरत
- रवी रामजीभाई आजगिया (३६), कतरग्राम, सुरत
दि. २८ जुलै रोजी या आरोपींना अहिल्यानगर न्यायालयात हजर केले असता मुख्य न्यायदंडाधिकारी यांनी न्यायालयीन कोठडी सुनावली. याप्रकरणी सायबर पोलिस निरीक्षक मोरेश्वर पेंदाम यांच्या नेतृत्वाखालील पथकाने ही कारवाई केली.
पोलिस उपनिरीक्षक सुदाम काकडे, अंमलदार अभिजीत अरकल, मोहम्मद शेख, अरुण सांगळे, गणेश पाटील, अप्पासाहेब हिंगे व महिला अंमलदार सविता खताळ यांनी तपासात मोलाची भूमिका बजावली. या कारवाईस पोलीस अधीक्षक सोमनाथ घार्गे व अपर पोलीस अधीक्षक श्री. वैभव कलुबमें यांचे मार्गदर्शन लाभले.
सायबर पोलिसांचा इशारा : व्हॉट्सअ‍ॅप गुंतवणूक ग्रुप्सपासून सावध रहा. अनोळखी व्यक्तींना बँक खाते, OTP, ATM, सिमकार्ड यांची माहिती देऊ नका. अशा प्रकारच्या फसवणुकीबाबत तात्काळ १९३० किंवा १९४५ या सायबर हेल्पलाइन क्रमांकावर संपर्क साधण्याचे आवाहन पोलिसांनी केले आहे.
