येथे क्लिक करुन आम्हाला फॉलो करा
अहिल्यानगर - नगरपालिका आणि महानगरपालिका निवडणुकांमध्ये मिळविलेल्या घवघवीत यशानंतर, वंचित बहुजन आघाडीने (VBA) आता आपला मोर्चा ग्रामीण भागाकडे वळवला आहे. आगामी जिल्हा परिषद आणि पंचायत समिती निवडणुकांच्या पार्श्वभूमीवर अहिल्यानगरमध्ये दक्षिण आणि उत्तर जिल्हा पदाधिकाऱ्यांची संयुक्त बैठक पार पडली. यामध्ये स्वबळावर किंवा भाजप (BJP) वगळून समविचारी पक्षांसोबत निवडणूक लढवण्याचा महत्त्वपूर्ण निर्णय घेण्यात आला आहे.
विजयाचा रथ ग्रामीण भागात नेणार : गेल्या काही वर्षांत पक्षाने शहरांमध्ये आपली ताकद सिद्ध केली आहे. या यशाचा उत्साह कार्यकर्त्यांमध्ये कायम राखण्यासाठी आणि ग्रामीण भागातील सत्ता काबीज करण्यासाठी पक्षाने आतापासूनच कंबर कसली आहे.
राज्य महासचिव किसन चव्हाण (Kisan Chavan) यांनी कार्यकर्त्यांना मार्गदर्शन करताना सांगितले की, २०१९ पासून कार्यकर्त्यांनी घेतलेल्या परिश्रमामुळे आज पक्षाचे १०० हून अधिक नगरसेवक निवडून आले आहेत. आता हीच विजयाची परंपरा आपल्याला जिल्हा परिषद (ZP) आणि पंचायत समित्यांमध्ये (Panchayat Samiti) घेऊन जायची आहे.
प्रवेश आणि सत्कार सोहळा : या बैठकीचे औचित्य साधून मंदाताई अडागळे आणि आस्मा शेख यांनी वंचित बहुजन आघाडीत जाहीर प्रवेश केला. राज्य उपाध्यक्ष दिशा शेख (Disha Shaikh), उत्कर्षा रूपवते (Utkarsha Rupwate) आणि किसन चव्हाण यांनी त्यांचे पक्षात स्वागत केले. तसेच, गेल्या निवडणुकीत पक्षाकडून झुंजार लढत देणाऱ्या उमेदवारांचा राज्यस्तरीय पदाधिकाऱ्यांच्या हस्ते विशेष सन्मान करण्यात आला.
बैठकीतील महत्त्वाचे मुद्दे :
- निवडणूक धोरण : आगामी निवडणुकांमध्ये भाजपला दूर ठेवून इतर समविचारी पक्षांशी युती करण्याबाबत किंवा स्वबळावर लढण्याबाबत चाचपणी.
- प्रभावी मांडणी : ग्रामीण भागातील सर्वसामान्यांचे आणि वंचित घटकांचे प्रश्न आक्रमकपणे मांडण्याचे आवाहन प्रवक्ते प्रा. अरुण जाधव आणि उत्कर्षा रूपवते यांनी केले.
- संघटन मजबुती : उत्तर आणि दक्षिण जिल्ह्यांतील सर्व तालुक्यांमध्ये कार्यकर्त्यांचे जाळे अधिक भक्कम करण्यावर भर.
उपस्थित पदाधिकारी : या बैठकीस राज्य उपाध्यक्ष दिशा शेख, आदिवासी नेते अनिल जाधव (Anil Jadhav), दक्षिण जिल्हाध्यक्ष योगेश साठे (Yogesh Sathe), उत्तर जिल्हाध्यक्ष संतोष चोळके, जिल्हा महासचिव प्रसाद भिवसने, मधुकर साळवे, योगेश क्षीरसागर, अजित कुऱ्हाडे, सोमनाथ भैलुमे, फैरोज पठाण यांसह विविध तालुक्यांचे पदाधिकारी, कार्यकर्ते मोठ्या संख्येने उपस्थित होते. प्रास्ताविक संतोष चोळके यांनी केले, तर आभार प्रसाद भिवसने यांनी मानले.
